مو كالوا جديد الوطن راح يصير كبل وين الوضع عن الوضع هسة
كبل خنساء وحدة وكلهم يعزون هسة بكل زقاق وكل فرع خمسة
كبل ما ننسة ميت لو تمر سنين وهسة الصبح ندفن والعصر ننسة
شوفوا الناس تحرس لا وطنه يضيع وليش احنى الوطن ما نعرف نحرسة
هسة الدنيا خربت والوطن منهوب يفرغ بير حزنة وبيدنة نترسة
وتاهت والوضع ما تدري صار شلون الشرطي والحرامي تشابه بلبسة
كبل جانت الغيرة تعلي بينا الصوت أشو حتى أبو الغيرة ما طلع حسة
كبل جان الامان يطب على البيوت وهسة البشر كام يخاف من نفسة
وطن للشمس بيت تنام بيه نجوم غيوم الدنيا كله ما تظم شمسة
يرجع شي اكيد ويرد بينا الحيل وتتعالى الاصوات وماتظل خرسة
اطلع يا غريب البيت لاهل البيت طاهر ما نريد اقدامك تنكسة