الوداع

الى كل من بل منتدا الجميل موضوعي هوة عن الوداع والى متا راح نبقى نودع الكرايب والاصدقاء وشوكت راح نلتم كلنا بمكان واحد اني حجيت بهذا الموضوع لان ودعت اقرب انسان ال كلبي ابن عمي واخوية ملاذ واكثر مرة اتاثرت بيها بوداع بيت عمي ميخائيل صنا والي اتمنالهم كل الموفقية يا رب بس الى متا راح نبقى هيج كل واحد بجهة بعد ما نتربا سوة واحد يتعلق بل الاخ نفترق وبكل سهولة كل الي اتمنا نكون كلنا الكرايب بمكان واحد يارب

شكرا جوليا شكرا على شعورج الحلو ويارب توصل دعوتج ونلتقي كلنا بمكان واحدواتعرف عليكم انتو هم وجنت اتمنا اعرفكم انتو هم لانكم كرايبي وما اعرفكم سلامي للاهل

شكرا دودو على مرورج الحلو

اكيد الوداع اصعب شي بالحياة وخاصتا من تودع اقرب انسان الك وتكون متعلق بي وبشكل خاص احنة العراقيين تعلمنة على الوداع وتعلمنة على الاذية بس نكول الله كريم وانشا الله كلنا نلتقي وياربي يوم توصل لملاذ وتلتقون
وشكرا لؤي على الموضوع الحلو بس بنفس الوكت الصراحة بجيتنة
تحياتي

شكرا أللك اخ لؤي على الموظوع الحلو
هذا صار حال العراقين لو اتودع ناس لو الناس اتودعك وطبعا اني يمي اصعب شي هو الوداع ولو بايدي الغي هاي الفقره واني اعز صديقاتي من سافرت ودعتني قبل عشر تيام من سفرها وهذا جان طلبي بس هم صارت مناحه.. اما من سافرت اني فيا بيت جنت دادخل داكول خلي نتفق حتى منبجي وطبعا هذا الشي اكيد مصار لان اني مقصرت بل بجي اما صديقاتي فودعتهم بلتيلفون بس ومشفت اي وحده بيهم لان اني يمي وداع الصديقات اصعب فيارب تلتقي بملاذ باقرب وقت... واني معروف عني انوا اتهرب دائما من الوداع والكل يعرف

الوداع اصعب موقف واجهتا بحياتي والمشكلة واجهتا على 3 مراحل الاولى جانت من عفت بلدي وكرايبي وبيتي وكنيستي ومنطقتي على امل اللقاء بس امل ضعيف وبعدين ودعت امي وابويا بسوريا وعشت اصعب فترة بحياتي بدونهم لان ما متعودة على عدم وجودهم بحياتي بس الحمد للة اللة ما ينسا احد والمرة الثالثة وانشاء اللة تكون الاخيرة من ودعت صديقاتي والناس الي كونت علاقات حلوة وياهم بسوريا ونرجع ونكول هاي حال العراقيين وانشاء اللة تجي هنا ونلتقي كلنا وتلتقي بملاذ مرة ثانية وميرسي لؤي على الموضوع الحلو تحياتي

شكرا سلفا على مرورج وعلى مشاعرج الحلوة ويارب نلتقي كلنا بمكان واحد

شكرا دندونا يارب التقي بيكم من جديد بنت عمي الوردة تحياتي

شكرا الج ايفا ويارب يجمع شمل كل الناس

حبيب كلبي اخوية الجبير وابن عمي ابو اللول صدك مشتاقلك موت وتسلم عالموضوع الحلو هذا الوداع فد شي صعب ومشكلتنا احنا دنعيشة مو مرة وحدة ديتكرر عدنا مشهد الوداع كل فترة ياربي يوم التجي ونتشاوف مرة ثانية انت وكل الأهل ونلتم مرة ثانية وتنعاد ايامنا الحلوة وياربي نخلص من هذا الشي اللي اسمة الوداع ونخلص من شي اسمة غربة ونلتم كلنة بمكان واحد مو مهم وين المهم مكان واحد يجمعنا ونكدر نعيش بيه بسلام تحياتي الك وشكرا عالموضوع مرة ثانية اخوك الصغير
ملاذ صنا

حياتي انتا كول يارب نلتقي وماريد شي لان انتا تعرف انتا شنو يمي الله يصبرني على فراكم